سـنـی سـئـویـرم



مـن سنی دلیجـه سینه سئودیم..


و

اؤلورجـه سینه سَنی سئویرم...

سنین سئوگین سَسسیزجه ایچیمه سیغماییر...باغیرماغیم گلیر بو 

سئوگی نی....

اؤیله سئویرم کی من من دئییلم...من سن اولموشام..

آلما مَندن بــو جانی اوله رَم.....


منی دیلیم دن آسسالار دا... گؤزلریم له ، اوره ییم له، بوتون جانیم لا 

هایقیراجاییم "سـنـی سـئـویـرم"...

و

"سـنـی سـئـویـرم"...

"قانادلی قیز"



یازار آتیلا گونئیلی بو 92/04/07 یازیلمیش قونو سئوگی شعیرلری | بو یازیا لینک


نه خبر اولاجاق


نه خبر اولاجاق

دوداقلاریما جالادیغین گولوش

چیچک وئریب اوره ک باغیمدا

سئوگی دولوسو منه وئردیین او اوره ک

کعبم اولوب مومون مومون باغیریرام سنی

اوپورم نفسینی

نه خبر اولاجاق

بیر خبردیر گونده مین یول دؤنه دؤنه سرگیلنیر

اؤزله نیش آجی دئییل

سیجاق سیجاق ساریلما وار اؤزله دییم او یئتینجده

اؤزگورلویون تانریسی دیر باغلانماغیم

اوره یین دوستاغیندا

نه خبر اولاجاق

ووردوغون قاندال گول آچیب بیلک لریمده

بارماقلاریم سؤزجوک یاغیر

سئوگی دولو جیزگی لرین یاخاسیندا

نه خبر اولاجاق

سانجی باسمیش سؤزجوکلریم

آرتیق لزگی دانسا کئچیر کاغاذلارین سینه سینده

سنی یازیر بارماقلاریم

نه خبر اولاجاق

سینیخ کورپو اوپدو یئنه پارچالانمیش تیکه سینی

گؤروشمه دی

بولونماک دیر

بولوشدولار

اَزل دئیه ایکی سئوگی

ابدیلیک قوجاغیندا

نه خبر اولاجاق

اَبدیک یئنیک دوشدو

قوپماز سئوگی قارشی سیندا

بیر خبر اوره ییمدن

داریخیری اَللرینی

دوغرو تمیزلیین سیمگه سی او پینار اوره یین منده گئزیر

آمما سئویر دلی کونلوم

اوره یینین گؤزگوسونو

نه خبر اولاجاق

باغلانماغیم گلیر هر آن

صاف سئوگینین باغلارینا

هله بیرده

دلی بیری

دوشوب گئزیر کوچه لری

آختاریری دلی دلی

باغلاندیغی او قاپینین چاخچاخاسین

چال چال منی دئین قیزین

ائلچی سی دیر آددیملاری

هله بیرده خبره باخ

سئوگیلیمن یاناغیندان اوپدوم اوچ گول

دوداقلاریم قرنفیل لر قوخوسونا قوناق اولوب

اوپدوم قیزمار او شه هرین

ایستی پولاد ایکی الین

سیجاق سیجاق او تَریندن

نه خبر اولاجاق

من سئومیشم بیر پرینی...

"آتیلا گونئیلی"

پ



یازار آتیلا گونئیلی بو 92/04/07 یازیلمیش قونو سئوگی شعیرلری | بو یازیا لینک


گئل

 

بو گئجه لر دوشلریمین  قُـووشماسی دیر

ماچی آتیرام غربتدن گئلن دوشلریمه

گئل

زنجیر چیچه یی کیمی گئل

دوشلریمین گئری دونوشونه ائلچی اولدون سن

سن لاپ اوزاق دوشَن هنده وریمسن

یورقون دوسوم منیم

ائله بیر اوزاقدان گئلدین کی

اوردا دومان باسمیش

اوزاقلیغیمی

گئل سنه بیر ایستیکان شعیر دَمله میشم

اوره ییمدن سوزولور

توکموشم

گئجه لریم گوندوزلریمله قـُووشوب

قوجاق دانسینا چئوریلیب هر آنیم

خیاللاریم ماچی آتیر هنده وریمه

سن ائله سانما

یوخو سنی مندن آلیر

یوخومدا گورورم یاکاموزلوغونو

سنیله ایچیب ایچمه دییم دوداق شارابینی شعیره چئویریرم

الکول قوخویور یوخولاریم

یوخومدا آییلیرام سنی

چیین چیین ساللانیرام یورقان دوشکده

اویانیشیم یاریر گئجه نین باغرین

سن گئل

گئجه نین دامارین وورورام

گوندوزومده دانیشیم دئیه

سنی اویانیم دئیه

سؤزجوکلریم قان توکولور کاغاذلارا

 کوچه لره قان سئپیرم..

یوللارینی توز آلماسین...

"آتیلا گونئیلی"



یازار آتیلا گونئیلی بو 92/04/06 یازیلمیش قونو سئوگی شعیرلری | بو یازیا لینک


بیر شئی لر اولموش ...

 

کئسین بیر شئی لر اولموش منیم حقیقتیمه

کئسین فلسفم دیز چوکموش سنین گولوش فلسفه نه

بوتون گئجه لریم سنله دولودور

گئجه نئدیر کی

بوتون گوندوزلریم سنه بویلودور

دوغاسیم گئلیر سئوگی آدلی تانریجامی

یاشامین گیله سینه

گؤزلَریمین گؤزلَرینین دَرین لیینده آخان یولو تانییرسان

هاردا بیته جک بیلیرسن

او یول قاپینیزین چاخچاخاسیندا بیته جک

قاپینیزی قوخوندان تانیرام

جالادیغین او گولوشدن تانیرام

جیزگی لریم

ساز سسیندن آلدیغیم هاوادیر

یوخ ائله سانما آشیق دیر چالیر

چالا بیلمز کی

اوره ییمین تللرینده هاوالانیر گؤزلرینین

گؤزلَریمیزین تورکوسو

و

دوداغیندان اَمدیییم شاراب دیر سؤزجوکلَریمین سرخوشلوغو

تانریلیغیمین اعجازی دیر سنین گؤزلرینی یازماق

هله سنی یازماق تانریلیغیم دیر

آمما

بیر آن بئله دوشونسن کی منه بیر شئی اولمامیش

سانجی باسار قلمیمی

بئلی سینار سؤزجوکلریمین

پس اوندا او سَسیمین تیترک لییی نه

اَللریمین اؤزلمه سی نه

نیه سونو یوخدو سنی سئودیغیمین

وطن چیچه یی گولوم

آل یاناقلیم

اوخ کیرپیکلیم

قارا قاشلیم

شاراب دوداقلیم

ساقین بیر شئی اولمامیش یالاواج جیزگی لرین تانریسینا دئمه

گؤزو یولدایام هئییییی

گؤزو یولدا

گؤزوم یولدا

هارا باخیرسام گؤزلرینین دوستاغیندایام

سن قیشیمین شاختاسیندا

چیخان قار چیچه یین دَن گئلدین

گؤزلریمی آچینجا سنی گورورم

سَسین اَسیر حدودوما

گؤزلریمی یومونجا

سنله اوچورام

چیلغین لپه قوجاغیندا

آه سئوگیلیم

بیر بیلسن

سن سیزلیک اؤلوم لئچه یی سَریر ثانیه لریمه

وارلیغیما

جیزگی لریمه

سن سیز

یوخلوغون

او بیری آدی یام

 

"آتیلا گونئیلی"

 


یازار آتیلا گونئیلی بو 92/04/06 یازیلمیش قونو سئوگی شعیرلری | بو یازیا لینک


قوجاغام دردلرینه


بوتون اوره ک چیرپینتی لاریمدا هارایلانیر آدین


وئردیین اوره ک,جالادیغین گولوش,هایدی دئدیین اوچوش

ایچیمده ساخلانیر

اَللرینله چالینان او سئوگی ماهنی سی دیر

اَلیمده سسله نیر

دیسکینمه گولوم اوره یین سیخی توت

یادیندا دئدیم اوره یینه دئه

یوخ سن دئمه  آرتیق اوره یینده اوره ییمه جان قاتیر

جان آلیر

اوره یینین شفقلی گوزگوسونده کدر توزونو سیلیر گؤزلریم

باخ گولوم منیم سَسیمدیر جانلانان او تورکونون سؤزجوکلرینده

سن سَسیندیر هاوالانیر گؤزلریمین تورکوسونده

بیزی نه آنلار کی دونموش سئوگی لر

ساختا گولوش لر

دیسکینمه گولوم ایلقاریما گوروش گونوندن اوچ قات داها موهورَم

بوتون دویغولاریمین هارایی اَللریمده قالانیر

قاپینیزین چاخچاخاسیندا باغیراجاق اَلیم

 

گؤزلرینه دئه یاشا دولماسین


آخی آندلی یام گؤزلرینه


دوداقلارینا دئه گولوشه کوسمه سین


آخی وورغونام گولوشلرینه


نفس لرینه دئه نفسیم دیر


باغلی یام نفس لرینه

 

اَللرینه دئه قورخماسین


ایلقارام تمیزلیینه


یاناقلارینا دئه اوتانماسین

 

سوز وئرمیش بیری یم


آند ایچمیشم عصمتینه 

 

منی منیمله آنلا گولوم


اوره یینه دئمیشم توختاسین


آخی قوجاغام دردلرینه

 

اَللرینه دئه قورخماسین


ایلقارام تمیزلیینه


یاناقلارینا دئه اوتانماسین


سوز وئرمیش بیری یم


آند ایچمیشم عصمتینه


منی منیمله آنلا گولوم


اوره یینه دئمیشم توختاسین


آخی قوجاغام دردلرینه


اوره ک دویونتولرینه....

 

"آتیلا گونئیلی"



یازار آتیلا گونئیلی بو 92/04/06 یازیلمیش قونو سئوگی شعیرلری | بو یازیا لینک


گل سئوگیلیم

 

آل اَلیمی اوره یینین باشینا قوی

گل سئوگیلیم قوجاغیما دول

نه زنگین دیر قوجاغیم

سن بویدا سئوگی سیغمیش قوللاریما

سنله یاشاماسام

اؤلوم هاواسی چالار اوره ییم

گولوش تانریم

گول

اوره ک باغیمدا اَکدیین چیچکلر

گولوشونله جانلانیر

چیچکله نیر

گل سئوگیلیم


"آتیلا گونئیلی"



یازار آتیلا گونئیلی بو 92/04/06 یازیلمیش قونو قیسسا شعیرلر | بو یازیا لینک


بیز اؤزگوروز دئدیک


دوالیست بیر دونیادا حقیقت ایکی اوزویله سرگیله نیر


آینی نهلیست دوشونجه سینین اعتراض سندی کیمی

باغلانمادان اولور ایچیمده کی یاشام

هوندور هوندور باخیب باغلانمام دئدیکلریمده اولدو

آمما هپ سول یانیم بوشلوقلارا اوغرادی

بوش بیر یاشام اولوم دئمک دیر

باغلانمادان سولوم آجی وئرجکدیر ایچیمه

هانی باغلانمایین دئیین لر

اوره کله بئینله تنله باغلاندیم

آلیب گوتوردو منی مندن

ایچیمده سوس دئدییم قاه قاها

اوپدو دوداغیمدان گولوش تانریسی 

جالاندی دوداغیما اویاندی ایچیمده کی یاتان گولوش

باغلاندیم گولوشونه دوداغینا

بیرده او گئجه ده کی اوچوش

دیم دیک دوروب باخدی گؤزلریمه

اوچدوم ....اوچدوق......

قانادلاریمیزی سئویشدی

گؤیون باغرینی دئشدی

باغلاندیم من اوچوش اولدوم

اؤزگورلویون تام اؤته سی

فلسفه نین فلسفه سی

هله هاراسی دیر کی

بیر گون اوره یینه دیز چوکدوم

بیراخ هامی کافیر دئسین دئدیم

وور چیچکلنسین بیلکلریمده کی قاندال دئدیم

مومون دوشدوم قان اداسی دئیه بیر کعبه یه

هر آن دؤنه دؤنه اوپدوم

من کافیرلییمده مومون اولدوم

باغلاندیغیمدا اؤزگور

ایکی اوزلو یاشامدا

سؤزجوکلره اَسیر اولماز دوشونجه میز

بیز اؤزگوروز دئدیک

 

"آتیلا گونئیلی"



یازار آتیلا گونئیلی بو 92/04/06 یازیلمیش قونو سئوگی شعیرلری | بو یازیا لینک


وطنیم سنسن...

 

بیز بیر اولایدیق اوز وئردیق

اوز وئرمه یه دوغرو آددیملامادیق جان آتدیق

قوجاق قوجاغا

وطن سیزلیک دؤنه مینده

منه وطن قوجاغیندیر

سنه وطن قوجاغیم

اؤیله سئودیریر سنی گؤزلرین، سَسین ، نفسین

دارالدتماغیم گلیر وطنینی

سیم سیخی

منی گؤزل خاطیرلا

سنه یولداش اولدوم

سئودیم

یادیندا من سنی سئودیم دئدیم

هر نئینی بوتونلوکله اوزونو(جوهر زات)سئودیم

من سنی سئودیم گولوم

بیر تک هارایملا سن و وطن

وطنیم سنسن...

 

"آتیلا گونئیلی"



یازار آتیلا گونئیلی بو 92/04/06 یازیلمیش قونو سئوگی شعیرلری | بو یازیا لینک


اوره یینه مومنم...



بیر گئجه نین دَرین دَرین سَسیز لیینده

لزگی اویناییردی سوکوت گؤزلریمده

آی بولوتلا اوزونو سارمیشدی

روزگار سوسموشدو

سانجی سانجی سؤزجوکلریمی قوسموشدوم

آمما شاعیر دئییلدیم کی

رئاللاردان خیالا دوشَم

سقوطا وارام

اوچوشدوم او گئجه

من خیالدان رئاللارا اوچموشدوم

و بو بویوکه نئدن اولموشدو

بیر قانادلی قیز

اوره ییله اوچوردو گؤز گؤیومده

تئللر گئجه لریمین رنگی

کیرپیک لرینده اوخ سوسموشدو

یانیغینا گونش اوزونو توتموشدو

قاریلیغینی سولموش خالیندا

سحرین لوش بیر هاواسی چالینیردی

اَللری اوره کلی قیز

دوداغیندا تمیز بیر دویغو الکول اولموشدو

سرخوش ائدیردی دوداقلاریمی

هله گولوش تانریسی اولموشدو

دوداقلاریما

شکر داغیم

جانیمدا جانیم

دیلیمده هاراییم اولموشدو

ایلک سوس سامدا

بیلیردیم

باغیراجاقدیم

ُخی

گؤزللییندن

بوتون گؤزللیک لره گؤز یومموشدوم

سوچ اولسامدا سئوگیلیم

اوره یینه ایضطراب سالسامدا

من یالنیز سنی دویموشدوم

سیلینمَز

اؤلمَز

بیتمَز

بیلمیر سؤزجوکلریم

آمما

تبریز موزه سینده یاتان او سئوگی لی لرین

اؤته سینی وورموشدوق

تاپیناجاغیم دیر اوره یین

دیز چوکموش بیری یم

اوره یینه مومن

قوی کافیر ساییلیم تانریچالار گؤزلرینده

سنه اولان ایمانیم حاققی

من دیم دیکم

دوپ دورویام گؤزلرینه

من مومونم اوره یینه

سن بوتون آجیلاری منه بیراخ

یول وئرمه اوره یینه

آخی

بیلیرسن

دئدیکلریمی یالان اولسا گئل توپور سیفه تیمه

سوزجوکلریمه

ایمانیما

آخی بیلیرسن

اَللریمی یاندیرسالاردا

گؤزلریمی اویسالاردا

دیلیمی سوکسه لرده

یوموروقلاسالاردا دویغولاریمی

دوداقلاریمی

اوزومله توپراغا یازاجاغام

سنی نئجه سئودییمی

"آتیلا گونئیلی"




یازار آتیلا گونئیلی بو 92/04/06 یازیلمیش قونو سئوگی شعیرلری | بو یازیا لینک


وطنینم دئدین...

گؤزلرین گؤزلریمه توخوندوغو آن

یاشام یئنیک دوشدو یاشادیق لاریما

سن دئمه توخونمادین

توخونماق نئدیر کی

جلادجاسینا قیردین ایچیمده کی آجینی کـَدَری

اؤلدوردون گؤزلریمده کی سَس سیز لییی

 قوجاغیما سیغدیغیندا

 سن دئمه بیر شئی یاپمادین

سن قوجاغیمی جادی ائتدین وئردیکلرینله

سن دئمه بیر شئی وئرمه دیم

یاشادیقلاریم بویوندا

بؤیله بیر حال آلمادیم کیمسه دن

من آلدییسام

 سن وئردین دئمکدیر

اَللرین اَلیمده ، چینینم چینیننه سوروشدویونده

دوغمالیغینی آلدیم سنده

منه سن بیلیرسن نه دئدین

وطنینم دئدین

 باغیریردی گؤزلرین

یوخسا نه چئکه بیلردی منی

سنی قوجاقلاییب دَلی لر کیمی اوپمه یه

اؤیله بیر حال وئردین کی

یازیلارا سیغماسادا

سؤزجوکلر بارماقلاریمدان سوزولورکن

بئینیم اوچوشا واریر

یادیندا گؤزلریمه باخدین

سرخوشام او آندان

سن دئمه بیر شئی ائتمه دین

سن بیر باخیشلا ایچیمه دولدون

قوخونا سرخوشام گولوم

سن گل دئمه سه ییدین

اوپمَزدی دوداقلاریم

سیخماز قوللاریم

 باخمازدی گؤزلریم

دوغرو من وورولدوغوم او گؤزل اؤلورجه سینه باخیردیم

 ایچینی اوخویوردوم گؤزلریندن

ایندی او آنلاری یازارکن

یئنه سن دئمه بیر ایش گورمه دین

یا منده گئزن بو حال نئدندیر

سن وئردین گولوم

من آلمایا گلمیشدیم

سن اَلینی وئردین

منسه اوپوجوکلریمله اوره یینه توختاق وئردیم

من سنینم گولوم

دئدیم

سنده منه بیر اوکئان بویدا دورو آیدین بیر اوره ک وئردین

اونداندیر هاوالانیر سؤزجوکلریم

منه سؤزجوک تانریسی دئیین گولوم

سؤزجوکلریمه سندن دوغولور تانریلیق

آینی دوداقلاریملا یاناغیندا دوغان اوپوجوکلر کیمی

سن اولماسایدین

وئرمه سه یدین او حالی

 اوپمَزدی دوداقلاریم

دوغرو بؤیله بیر سؤز دئدییمده

آبارتی حاللارینا آتیللار منی

آمما گولوم

ان یاخینیما سور

من ایلک گوندن سنی هئچ گوروب تانیمادان

سنی سئومیشدیم

بیراخ نه دئییرلر دئسین لر

دلی اولوب دئسین لر

دوغرو من ایلک گوندن دولاشیر ایچیمده بیر دلی لیک

دوغدوم او دلی لیی سؤزجوکلره

اَللرینه

یاناغینا

اوره یینه

من اَزلدن پریمین ابدیلیکه بئله سیغماز دلی سی یم...

"آتیلا گونئیلی"

 


یازار آتیلا گونئیلی بو 92/04/06 یازیلمیش قونو سئوگی شعیرلری | بو یازیا لینک


بولدوک بولوندوک...



نه گؤزل دئمیش دیر شاعیر

آیری آیری یاشاماقدانسا بیر آرایا گلدیک

اوزاقلارین قویوسوندان یاخینلارین گویونو اوپدوق

دوغرو اوزاق دیر آرامیزدا کی مسافه لر

یا بو منیم ایچیمده دولاشان دا کیم دیر

یاخیندان هر کس سئور

اوغولسان اوزاقدان سئو

سئودیم

سئودیک

سئوگیمیز بیر بومبا پاتلایشیدیر

تانینماز اولدوغوندان

گورلاییر شه هَرین تپه سی

سوسموش قارقالارین سوزو

آخی بیز سیلمَز اولدوغوموزدا

سیلدیک بوتون اوچوروملاری

اوچدوق اَل چاتمازلاری

بیلمم نئدیر اوره ییمده چاغلایان

دپرم می؟

یوخسا پاتلامیش اوره ییمده دینامیت بیرسئوگی

گؤروش دئییل دیر بیزیم کی

بولدوک

بولوندوک...

 

"آتیلا گونئیلی"



یازار آتیلا گونئیلی بو 92/04/06 یازیلمیش قونو سئوگی شعیرلری | بو یازیا لینک


داریخیردی گئجه...



داریخیردی گئجه


داریخیردیم او گئجه

سولوم ساغیمدا بوغولوردو


سؤزجوکلَرده ، اؤلوم آجی آجی دوغولوردو

سانجی باسمیش اوره ییمه غم دولوردو

غَم بایقوشو سئوگی قوشو

سَس سیز سَس سیز سوزوشوردو خیالیمدا قانادلی قیز

بیر سس گئلدی قولاغیما

باش قالدیریب گؤیه باخدیم

آی اولدوزلو گؤزلَریله نور ساچاراق گئجه وورموش گؤزلریمه


سؤزجوکلریم شور هاواسی چالیر بیردن

کاغاذلارین سینه سینه

سَس وئریردی گؤزلریله سؤزجوکلرین نفسینه

دار دولاشیق نوتاسینا

وورغون دوشدوم قاناد چالان گئجه گؤزه

کئفلنیردی سؤزجوک سؤزجوک شارابیمدان

گؤز آخیردی

جان آلیردی

جان آلیردیم دوداغیندان

یئنیب گئلدی قوجاغیما

منه وطن قوجاغی دیر

وطنی اولدو قوجاغیم

قوجاق وطن کئسیلمیشدی وطن سیزلیک دؤنه مینده

اوتاناراق چیلغین لپه بیر آن اوپدو دوداغیمدان


وطن دولو سئوگی سی وار اوره یینده

گولوش ساچدی کدر وورموش دوداغیمین نوتاسینا

قوجاق اولدوم قوجاغینا

بیر گون وطن قارا گئیمیش بولوتلارا قوناق اولدو

آمما یاغیش

سانکی اوره ک ائلچی سی دیر

گئتیردیغی کیتابی دا اوپوجوکدور

و من یاغمور لزگی سینه سَس سیز باخدیم

شاراب آخدی دوداغیما یاغمورلارلا تورکو گؤزلوم...

 

"آتیلا گونئیلی"




یازار آتیلا گونئیلی بو 92/04/06 یازیلمیش قونو سئوگی شعیرلری | بو یازیا لینک


مـَنه سوچ توتمایین دوستلار


مـَنه سوچ توتمایین دوستلار ...

 

او اَللـَـرده اولان دویغونو اوخویان اولسا منَیم کیمی...

 

 سئوگی دیز چـوکـَر قارشیسیندا....

 


یازار آتیلا گونئیلی بو 92/04/02 یازیلمیش قونو قیسسا شعیرلر | بو یازیا لینک


گوروش ماهنی سی


بیز اوچ نفر ایدیک
سن...من....
بیرده آرامیزا آیریلیق سالان یوخو
بیز,بیز اولدوک ایشته
نه سن...
نه من....
بیزده یوخو نه گئزر
سونرا بیر قیزقین شه هرین اورتاسینا آتیلدیق
اَل چنه ده
گؤز اؤلورجه سینه سئیر ائتمک ده
من یالنیز باخیشدیم هارای دولوسو
سوسمادان هئچ بیر یئریم
یادیندا باش باشا گؤزومه باخدین
دلیجه سینه اولدوم
اود وئریر سئوگی میز
توخونمایین یانارسیز
توخونمایین................
هانی گؤزلریم آنا
هانی منیم گؤزلریم
چالمیشلار آنا
بیریسی چالمیش آنام
اوستونه تیتره مه دی اَللریم گولوم
آیریلیق دپرمینه دام دوار اولوب اوچدوم
هانی منیم جان ائویم آنا
بیریسی دپرم سالمیش
: گئلده گور منه سن نئله دین
دپرم دوشموش اوره ییمه
یادیندا سن یانما دئیه
اَللریمی چتیر آچدیم
یانما دئیه
باش قالدیردی سؤزجوکلریم
یوخ
اَللریم دوداقلاریم
تریم ,ترین
باش قالدیریب چیلغین اوره ک
اوره ییمین اورتاسیندا
سانکی اونا هر گون راسلاشیرام
یادیندا
تئللرینی چالیردی اَلیم
ائشیدیردی تنین؟
گول بوداقلی بیر شال ایچره
گیزلی گیزلی کلاشینکفلار جان آلیردی
کئشکه تروریست اولسایدی گؤزلرین
ایندی ساحات آیریلیغین صاباحی
و اَل قالدیریشین آیریلیق هدیه سی
هر آن دیله دیم دوندون
بیر اینتحار دیر گؤروشون
بیرازدان دامارینی ووراجام سن سیزلیین
گوردون
قیریلدی سن سیزلیک
قاپی آغزیندا
ایلک باشدان وداع هاواسینین سانجی سی
اوره ییمده یدی
واخت تامام م م م م
آما سنی ترک ائده مه دیم
منده قالدی تمیز اوره کلیم
دوغرو سندن سونرا اوره ک قاناییردی
آما بیر یسی
گؤزلریمی چالیب گئتدی
نه گؤزل دئمیش شاعیر
"تورکولر چیچکدیر
ان اومودسوز آندا آچار"
نه سوسدورا بیلر کی بیزیم تورکوموزو
کیم؟
سلام جان دئمکدیر هر گوروشون
آما سونرالار دوشوندوم
سن هر آن یانیمدایدین
یانیمداسان هانسی آیریلیق
هانسی اوزاق وار کی بؤیله یاخین
 
دوغرو آنا حایات بو دئمک دیر آنا
سوسامادیم تورکوموزو
سوسامادیق
ای گولوم یاغمور سسین اوره ک ائلچی سی دیر
سئوگی یاغیر
یا ایسلاق ایسلاق بوغولسام
 
نئیلرسن
 
ایشته گئدیرم دئدیم
آما
هپ گئتمدیم
گئتمز اولدوم
بلکه سون بیر گئلیشدیر
بیرداها گئتمز
باش آلیب گئدیرم هئییی
سنده خطا یوخ گولوم تامام
بوتون سوچلار منیم
اینانان وارسا اگر
 
اینانیلیرسا اگر
بیلم گوروش دو یوخسا بولوشما
تیکه تیکه یه
بؤیله سیجاق,ایستی پولادلارین اوپوشمه سی دیر
وورولدو آدیم یاناقلارا
تیتردی اَلیم بارماغیم اَلینه
تئلسدی قولوم چینینه
اوخلاندیم کیپریکلرینله
سن سیز گئلن هر شئیه الوداع
صاباحا بئله
منسه بوتورکونون
ایلک صفحه سینده یازیلان نوتایا سرخوش اولدوم
جنایت اولدوم...

"آتیلا گونئیلی"


یازار آتیلا گونئیلی بو 92/04/02 یازیلمیش قونو سئوگی شعیرلری | بو یازیا لینک


بیز بیرلیکده موتلویوز

بیز بیرلیکده موتلویوز....


یاراتدیغیمیز سئوگی کوچه سی سن سیز یاشانماز...




یازار آتیلا گونئیلی بو 92/04/02 یازیلمیش قونو قیسسا شعیرلر | بو یازیا لینک


گؤزلریم یئتیم قالار

 


گؤزونو یومما   گؤزلریمه ...  گؤزلریم  یئتیم  قالار...

 

 ......

 

گؤزلرین گؤزلریمه جالانیردی

اَللریم اَلینده اَسیردی

قولوم چینینده تئله سیردی

گئدیش چاغیندا 

هر دیله دییمه

دؤنوب اَل قالدیریردین

قوپما اوره ییمدن یئتیم قالارام...

 

"آتیلا گونئیلی"

 

 


یازار آتیلا گونئیلی بو 92/04/02 یازیلمیش قونو قیسسا شعیرلر | بو یازیا لینک


قیش چاغیمدا اومود یورقانیم منیم

 

بوتون آنیلاریمین یاخاسی


گؤزلریمین اوزاقلارا باخان یولودور

قورشون گوزلرین باروت باخیشینا باخدیم دئیه

توتولدوم ماشایا

باخلاندیم کیپریکلرینه

ساز سسینه

تنینین قرنفیل قوخوسونا

گونش یاناغینا

سن قار التیندان چیخان قار چیچه ییندن گئلدین

جالاندین ایچیمه

قیش چاغیمدا اومود یورقانیم منیم...

 

"آتیلا گونئیلی"

 

...............

گؤزلرین محبت کوره سی دیر

اوت وئریر سویوخ گؤزلریمه

قیش چاغیمدا اومودوم....

 


یازار آتیلا گونئیلی بو 92/04/02 یازیلمیش قونو قیسسا شعیرلر | بو یازیا لینک


گل گور من کیمم ؟

 

چئرچئوه لر هارایمدان آسیلیر


هامی دونوخوب چئرچئوه دن شه هره

بیلمیرم نیه آجی شه هر ی گوتورور

جسارت یاغیر بارماقلاریمدان شه هره

دوشمن دوشورم ساختا سئوگی لره

ژکوندون گولوشونه توپورورم

نه گؤزل دئمیش سی.....ژکوند

دونیا بویدا وطن بولدوم

گؤزلری تاریخه سیغمیر

فلسفه م یئنیک دوشور گولوشونه

قوجاغی چیلغین لپه لرین دورمازلیغی

آلیب گوتورورب منی مندن

ایندیسه اوره ک دامار دامار پارچالانیر

سؤزجوک سؤزجوک سوزولور قان داملالاریم

ایندی گل گور من کیمم ؟

سنم؟

جادیر جادیر اوره ییمده یازیلمیش

سیلینمزلییین....

 

"آتیلا گونئیلی"

 


یازار آتیلا گونئیلی بو 92/04/02 یازیلمیش قونو سئوگی شعیرلری | بو یازیا لینک


دلی سن دئییرلر



 

سئوگیلیمین یاناغیندان من اوپوجوک دلی سی یم

دلی سن دئییرلر

من اونولا گوروش چاغی

باخیش باخیش جالاندیم

دیز چوکدوم

دلی سن دئدیلر

کافیرلییمه مومون اولدوم

کعبه م دئیه اوپوجوک یاغدیم

مجنون کعبه دن دیله ییردی

یارب بلایه عشقیله قیل آشینا منی

من کعبه مین عاشیقی یم

من سئوگینین اوزویم دئدیم

دلی سن دئدیلر

هر گون هر آن هر گئجه

زامان قابیندان داشان اوپوجوک اولدوم

هر یئرده هر مکاندا مکانا سیغماز سئوگی اولدوم

دلی دی دئدیلر

بیراخ نه دئییرلر

من سئوگیلیمین توتوقلوسویام

دلی سی یم دئییرم....

 

"آتیلا گونئیلی"



یازار آتیلا گونئیلی بو 92/04/02 یازیلمیش قونو سئوگی شعیرلری | بو یازیا لینک


اوپوجوکلریمیز ایلقاردیر سئوگیلیم



اوپوجوکلریم ,کرمین اصلی یه یانماسی دیر


و بونو هئچ نه آنلاتاماز

اوت وئریر نفس لریمیز

اَرییه جک دوداقلارین مسافه سی

قاپاناجاق گؤزلر

جان دوغاجاق دوداغیندان دوداغیما

اوپوشمه میز یاغمورلو بولوتلارین

ایلدیریم اوپوشمه سی دئییل

ایستی پولادلارین سیجاق اوپوشمه سی دیر

قوپماز

بیتمز

کوهنلمز

اوپوجوکلریمیز ایلقاردیر

اینام دیر سئوگیلیم.....

 

"آتیلا گونئیلی"

 



یازار آتیلا گونئیلی بو 92/04/02 یازیلمیش قونو سئوگی شعیرلری | بو یازیا لینک


سنله یاشانیر یاشام

سنله یاشانیر یاشام


و من سنله یاشامین اؤته سینی وورموش بیری یم

کومور قاراسی گوزلرینین دَرین لیینده 

جانلانیر او پینار تورکوسو

باش ساری تئل چالیر گؤزلرین گؤزلریمده

گؤزونه قوربان قارا گؤز

و من او تورکونون دلی سی یم

اولوم هاواسی دولورسا هنده وریمه سن سیز

سنله یاشام هاواسی دیر اوره ییمین تورکوسو

سنی نه آنلاتا بیلر کی سؤزجوک

منی نه دوشونور کی شعیر

من اوره یینین شاعیری یم

آرتیق خیال یازماز قلمیم

سن گل اوره یینله گل

شاعیر اولماغیم گلیر

سنی سوردوم 

یاناقلاریندا دولانان اوپوجوکلریمدن

سنی سوردوم

آخی بیر تک اوپوجوکلریم آنلاتار یاناغینی

و من سوردوم

چیچکلندی دوداقلاریم

اَلینی اَلیمدن سوردوغومدا

محبت یئنیک دوشدو اَلیندن دوغان محبته

یوخسا سنین آدین محبت دیر گولوم

آمما اوره یینی هئچ سورمادیم

من بویله سرخوش گؤرَن هر کس آنلایا بیلر منده نه اولدوغونو

من او دوم دورو پینار اوره یینین سرخوشویام

آیدین لیغین تانریسی دیر اوره یین

تانری.......

واز کئچدیم جنتیندن

مومون اولدوم سئوگیلیمین اوره یینه

کافیر دوشسم بئله درگاهینا

من پریمین دلی سی یم

من جنت قوجاغیدیر

نه آنلار کی سنی سؤزجوک

نه گئره ییمه دیر منیم شعیر یازمازسا سنی قلمیم

"آتیلا گونئیلی"

 

 


یازار آتیلا گونئیلی بو 92/04/02 یازیلمیش قونو سئوگی شعیرلری | بو یازیا لینک


سن منیم سرخوشلوغومسان...

 

 

گیزلی  لیک  لَرین یوواسی دئییل اوره ییم

 

بیر یووا تیکمه ده یم باغیرتی دولوسو


چیچکله سئودالانیب قوجاق دانسینا کئچمکده یم

سئویشمه میزین سَسی هر یئری بورویوب

من اونون اوره یینه اولمک ایسته ییرم

قانادلی قیزین چیلغین لپه قوجاغیندا دالغالانیر نفس لریم

اوره یی اوره ییمه لام آخیر

بیر پازل دیر بوتونله شیر

بیر جوت تیکه دیر قُـووشور

سینیخ کورپو بیزده اَل اَله گئزیر

من پری نین کئفلی سی یم

آرادیغیم سرخوشلوغومدور اوره یی

سرخوشام دوستلار سرخوش

بیتمز بیر سرخوشلوغون یولچوسو

آنام حاضیرلانمیش 

اوره یی دیسکینمه سین پریمین....

 

"آتیلا گونئیلی"



یازار آتیلا گونئیلی بو 92/04/01 یازیلمیش قونو سئوگی شعیرلری | بو یازیا لینک