بیر نفسلیک" سن" یئتر....

کؤکده ن وور تانری
اؤزلم چیچه یینین آجی کدر قوخوسونو
وور..وور گلسین قارقالارین پریود شارقی سینین سونو
یاریم بارداقلا دوعالاشیرام
یاریمام بوتونلویومده
غربتله ساواشیر یاریم
بیتمیش بیر پازلین فلسفه سی
تانری آغاجیندان دردییمیز او سؤزجوک
شاهید دیر ایچیمده کی دولاشان شارقی یا
دانلاسادا یاشام
تیمور آتلی لارینین یوروشویله شاعیره م
منیم کیمی شعیر اولماز
سنین کیمی گول ,هئچ بیر زامان سولماز
خاری بولبول نفسیله
آزاد قوشون بسته سیله
میشوودان قیی ووران او قارتالین اوچوشوندان
یارادیرام او شارقینی سؤزجوک سؤزجوک
یارادیر حسرتیم
قارادیر وطن آدلی شه هریم
بیر نفسلیک" سن" یئتر
سیندیرسین تورکوموز تبریز دومانین
چارشابینی باشیندان چکسین وطنین
بیر باخیش" سن" یئتر
هاوالانسین سؤزجوکلریم
اوکئان آدلی هارای دیر گؤزلرین
اوتوز ایل دیر حوکوم سورور گؤزلریمده
یاریم بارداقلا تانری لاشیرام
سنین شاراب گؤزلرینده ن
تانری سمفونی یاسی سسینی جالاییر قولاقلاریما
بارداغیما ایشیق دولور
پرده لرین باغری سوکولور
ائل گؤلوده, علی کیشی نین سینیخ سالخاخ قارمانی نین, یوخسول موسیقی سی
وارلانیر گؤزلریوین سمفونی یاسیندان
قان دولور شعیریمین دامارینا
قاندان دول, بوتونلویومه
بیراخما منی اؤزگورلویه
بیر بیلسن
گؤزلرین گؤزلریمه دولونجا
ایشیقدان بوغولورام
اوچوش, فلسفه سین قانادلاریمدان آلیر
قارتال لیغیم اوجالیر
ایشیق داغینین زیروه سینه قونورام
بارداقلیغیم توکه نیر
شعیر شعیر شاراب اولورام
تانری دوغورام

 


یازار آتیلا گونئیلی بو 93/08/16 یازیلمیش قونو سئوگی شعیرلری | بو یازیا لینک


...

 

گؤزلرین ، قارادلیک

ابدله قوجاقلاشمیش زامان سیزلیغینا توتوقلو اولدوم

بیراخما منی....

 


یازار آتیلا گونئیلی بو 93/08/14 یازیلمیش قونو | بو یازیا لینک


...

 

 

من ایچینده کی اوتوز ایل میزیلدایان شارکی یام .... سؤیله ر سن می ؟

 

 

 


یازار آتیلا گونئیلی بو 93/08/14 یازیلمیش قونو قیسسا شعیرلر | بو یازیا لینک


دهشت دیر سن سیزلیین آدی

 

لوش بیر زامانین یاغمور سنفونی یاسی

سن سیزلیین اؤزودور

ارکستر باشچی سی درد

شوپن دوغرانیر بارماق بارماقد

یاریمچیلیق دیر ساری گلین ماهنی سیندا کی حسرت

سن سیز هر شئی باش آلیب گئده ن قارا ترن کیمی

تانرینین تومانچاق لیغی کیمی

تبریزین سانجی سی کیمی....دهشت

دهشت دیر سن سیزلیین  آدی

سن سیز یاغموردا سوسوز

اوره ییم قیردوزدور وطن گلینی تک

او آغ گئیینیب....منسه قارا....

 

 


یازار آتیلا گونئیلی بو 93/07/16 یازیلمیش قونو سئوگی شعیرلری | بو یازیا لینک


پ..ریم

 

بیر کوچه دیر یوخلوغون,قویو دیبی بیر کوچه

یالنیزلیغیمین اؤلومویدو او گئجه

بکارتی سؤکولدو گئجه نین پنجره ده

قانادلی بیر قیز

کیچیک اللریله قوجامان قانادلاریلا

اوچدو گؤیلویومده

اوچدو....اوچدو قارانلیق کوچه نین دووارلاری

کؤچ آخینیمی گؤرونجه

سئوگی کوچه سینین دووارلارینا قازیلدی آدیمیز

آددیملاریمیزین ایزینه دوشوب

کوچه میزین گرچک دوواریندان بویلاندی

یالانلاری سئودالانانلار

یازیقلار اولسون اوچوشو گؤروب اوچوشدان قورخانلار

سئوگی شعیر دونیاسینین نارکوتیک قاچاق چی سی

یالان دولان دونیالارین پلاتونیک تانری سی

منم رئال دونیانین گرچک ساواش چی سی

یاشام بولودلانیب قارا گئیینیر گؤیومده

اوتانیر گؤزوم گؤزومده ن

قلم کاغاذدان اوتانیر

سؤزوم سؤزومده ن

آیریلیغین سانجی سی بوغور تبریزی

شعیر دوغوشونون سانجی سی دیدیر کاغاذلارین آغلیغینی

سوسوز گؤلون دوز سینه سینه قیلینج وورورام

گئجه نین قارانلیغیندا باشماق لاریمی جوتله ییره م

پریود دوشور دوشونجه م

سوزجوک لرله قان دامیرام

قاندیرانمیرام ایچیمده کی قهه ری آغ بئیین کاغاذلارا

اوزون بیر یولون یولچوسو

اوزاقلیغیمدان اوتانیرام

گؤزلرینین حرارتینده ن قایناییرام دئوریم دئوریم

تبریزی چالخالاییب

گؤی مچیدین میناره لرینده قارا گیله ماهنی سینی اذانلانیرام

هارایما دولور ایکی هیجالی بیر سس

پ..ریم

 


یازار آتیلا گونئیلی بو 93/07/16 یازیلمیش قونو سئوگی شعیرلری | بو یازیا لینک


مسئله ندیر تانری؟؟؟؟

بیر اؤیکودور قالدیریم لارین گئجه قاوقاسی

اؤیکو باشی تانری,سونوجو هئچ کیم

بوغولوردو کورلوقلار گؤرمزلیکده ن

کئچیردی آلا توران لیغیم گئجه لرده ن

یاغمور جلادجاسینا باغیریردی,یاغیردی

بوتون یاغمور دامجی لاری سوسوز

اؤپوجوکلرینی تاپشیرمامیش دی یاغمورلارا اؤپوجوکلو قیز

بورنومدان گلدی یاشامین قوسدوغو سو

باکیره سؤزجوکلرین بکارتی سؤکولور قلمیمده

قالدیریم یاخاسیندا آیلاق خیاللاریلا دولاشیردی بیر اینسان

خیاللاریندا بوغولموش رئال هارایی

یالانلارینین اینامیلا چارمیخا چکیلمیش گرچک

قالدیریملار سوکوتونو چینینده داشئیر

اوی سا یالانلارینی ایچینده

دوشونجه سی یالنیزلیغینین بئشیینی تولاییر

یاتسین یورقون خیاللاری

دینجه لسین استرس دولو یالانلاری

سکس سل راحاتلامادیر اولای دوشونجه یاتاغیندا

تک باشینا....

خسته خیاللارینین ایچینده آلدانمیش بیر قادین

لای لای چالیر سئوگی سینه

"لای لای امه ییم لای لای"

اللرینی اوزونه سؤیکه میش

سورغوسونون اوتانقاج لیغیندان

نده ن من" شارقی سینی آغلاییرl”

یالنیزلیغی پیچاقلاییر هذیان لارینی

تانیمادیغی اوچون آجییر تانیدیغی هر کسه

دونورام سویوق بورویور سنلی ییمی

ال قوزاییر سن سیز,قالدیریملار دویغولاریما

ثانیه لریمین کؤکو قیرلیر

ایلک گؤروشون فلسفه سینه دالیرام

بوغازیمدا تیخینیب سوسانلاری بار بار باغیریرام

اؤپدون دوداقلاریمین سویوق منطیقینی

چات گؤتوردو گولوشومون آجیسی

شاراق سیندی قاش قاباغیمین چرچیوه سی

مسئله سئومک دئییل یالنیز سنی سئومک میش

بوتون باغلاریمی قیریرام

منیم اوچون سامان یولو سنین گؤزلریندن کئچیر

وارلیق سنین اته یینده ن سو ایچیر

اؤیکو سونلانینجا آنلاییرام

مسئله سن دئییل سن سیزلیک دیر

یالانلارلا هورولموش ایپه ساریلمیش او اینسان

گرچه یی اؤلور

سون باخیشیمی قالدیریملارین سینه سینه پیچاق تاخیرام

گرچه ییمله یالانلاشیرام

نده ن من تانری؟؟؟؟

مسئله ندیر تانری؟؟؟؟

 

 


یازار آتیلا گونئیلی بو 93/07/16 یازیلمیش قونو سئوگی شعیرلری | بو یازیا لینک


سن یوخ کن

الیمده بومبا آدلی بیر وطن
عوصیان اوره ییمین ناخیشی دیر تبریز
قاییتماغیما بیر ساحات جیز
جینگیلده سین وطن ساحات قاباغیندا
بیر بیل سن
پوئمادیر قارا گیله گؤزلرین 
منسه اوندا یارانیرام
آجی چایی جالاییر یوخلوغون ایچکی بارداغیما
ایچکی ماساسینا دؤنور یاشام
منسه آجیلارلا سرخوشام
ائینالی دا حایات آغاجی سولونجا 
آلقی ارسینی قارقی لاریمدا بوغولور
گوجوم قلمیمده قورویور
بوغولور ساغلیقلاریم دوزلو گؤلون یاناغیندا
باختی دنیز وطنیم دنیزی دوز وطنیم
دوغولور حیکایه مین کوزلرینده گوز گوللری
دوداغیمدا اؤپوجوک یاغیشی کؤزه ریر
دیل سیز ایچکی شوشه سینین دوداغیندا بوغولور سؤزجویوم
چوخداندیر سیخیلماییب یومروغوم وطن وطن
چوخداندیر سوزولمه ییب تر داملالاری شعیر شعیر
چوخداندیر اوزولوب اوره ییمین بندی آلما آلما
سن یوخ کن
قارا گیله سیز قالیر او وطن
یئتیم قالیر شعیر
کیفسه ییر او مئیوه
آنلامسیز قالیر او یاساق
 

 


یازار آتیلا گونئیلی بو 93/06/11 یازیلمیش قونو سئوگی شعیرلری | بو یازیا لینک


ائشیت منی یولداش..

دیندیر منی باخیشینلا

شارکی لار اوخونمادان بیتدییی یئرده

سؤندور منی سسینله

شعیریم یازیلماقدان اوتاندیغی حالدا

میضراب بارماقلارینلا چال اوره ییمین قیریخ تؤکوک سیم لرینی

نوتالارین جیغال ائتدییی یئرده

ائشیت منی یولداش..

قارقالارین قودوردوغو خیاواندا

اؤلموش دونیانین "کئچمیش" آدلی کوچه سینده ایتیر آددیملاریم

گله جه یی میخلایینجا تانری تابلوسونا

جومور گؤزلریم اوزاق دوشموش نوقطاسینا

ایندینین چوخورونا دوشورم

دوش لریمین قیچی سینیر

سورولار بئینیمده ایت کیمی هورور

بوگون هانسی دونون صاباجی دیر؟

یاشامین قووالا قاچدی سی تپیک تپی یه چؤنوب

آرابانین دیغیراندیغی قارانلیغا ایشیق گلدیین کیمی

قالدیر منی یولداش..

قاطار سورور بئینیمده اوخومادیغیم کیتابلار

اوخودوقلاریمی یامانلیرام

دیکتاتوردور تانری

بوتون هارای لاری چئینه ییب دویدوقدان سونرا

تک سئچیم سوسماق دیر

بوغازیمدا سینان سس ,بوغولور سؤزجویومده

قارا باسیر قلمیمی

شعیریم یوخودان آتیلیب دورونجا

باخیشیندان سئوگی امیرم یولداش..

اوووت منی یولداش..

سؤزجوک لری اوتقوندوغوم سطیرلرده


یازار آتیلا گونئیلی بو 93/05/16 یازیلمیش قونو سئوگی شعیرلری | بو یازیا لینک


یوخوم گلیر ستاررررر

 

نیه آغلادیغینی بیلیرسن می سردار؟؟؟؟


عشق ایچینه عشق بالالاییر


بالام وطنه قوربان دئینده بیر آنا


جنت, آنا نین آیاغی آلتدا خیردالانیر


تانری یئرینده ن دوروب آغلاییر


تانرینین سایغی دوروشونا می آغلاییر سان سردار؟؟؟؟


ادبیاتیمی باغیشلا سردار


او تانری ایچیمده دیزله رینی قوجاقلاییب


توپراق یئیه ن اوغوللارین قوجالیب


چوخو آغزیمنان وورور آنالارین


تانری یا آلما ساتیرام سردار


توپراغی قوسوب یاتیرام


سنی ده یاتیرام سردار


سؤزجوک لره اؤلوم دئییر شعیر


سورویلا باشلاییب سورویلا بیتیر


بیلیرسن نیه آغلاییرام ؟


یوخوم گلیر ستاررررر

 

 

آتیلا


یازار آتیلا گونئیلی بو 93/04/07 یازیلمیش قونو | بو یازیا لینک


هئچ نه قاییتمایاجاق

بو گئجه هئچ نه قاییتمایاجاق

 

بئیین بیر دوراق , باشلی باشلانقیج لا باش سیز سونوج آراسیندا

 

بو گئجه هئچ بئیین ده قاییتمایاجاق

 

بؤیوک هئچ, چیبان دوغونجا گؤیه

 

سؤزجوکلر کاغاذ سینه سینده آسیلینجا

 

اینسانلیغیم توتوب قان سو یئرینه گئدین جه

 

قاغایی آغ کؤینه یین چیخارتیب

 

شعیریم اؤله جک.... جنازه نامازی دا قیلینمایاجاق

 

بو گئجه وطن گؤروشونه گئده ن اوغول

 

ائوینه دؤنمه یه جک

 

اوین لره دولاجاق

 

وطنه دوستاق

 

وطن دوستاق

 

وطنی دوستاق

 

بو گئجه آنالارین گؤز یاشلاری

 

دار آغاجی نین اوره یینده یالنیزلیق گولو بیتیره جک

 

بوینو بوکوک

 

سولوغو سولغون

 

بو گئجه شاعیرلر یازدیغی شعرینی بیلمه یه جک

 

بو گئجه بوتون سولاردا بیری بوغولور

 

بیریسی  ترن آرخاسینجا آغلاییر

 

اوتوبوس جان یاخیر

 

سن گئده نده ,ناماز باشارمیرام

 

جوم جیلاق کوفر اولوب آرخانجا سو سه پیره م

 

"سن گلنده " بو گئجه نی اونوتورام

 

آمان دیر سن گئتمه..بو گئجه هئچ نه قاییتمایاجاق

 

نه اولور اولسون, وطن جنت دیر, اونوتولمویاجاق

 

باخچا چیچک اونوتولماییب

 

قارچیچه یی اینتیحاری واراقلایاجاق

 

یاسا باتاجاق یاسالار یاساقلار ایچینده

 

بو گئجه قوینوما گیره ن قادین منه سئومه یی اؤیره ته جک

 

کؤلگه اؤلور ,زامان دینجه لیر

 

سن گولون جه, تانری سئویلیر

 

بو گئجه یوخو ، ارکین جنازه سینه ناماز قیلاجاق

 

آرامیزدا آیریلیق مفتیلی چکه ن یوخو

 

گؤی مچیدی قارالایان

 

گلستان باغینین عظمتینین باش داشیندا قورومساقلیق دکه سی قوران

 

وطنین قورشون یاراسینا دوز جالایان

 

هئی ی ی.... بوگئجه ـه ـه

 

یارا باندیمی سیخیرام

 

سو چیله ییر وطنین دوز باسمیش دوداق لارینا

 

وطن یئرینه یارالایین منی

 

 بو گئجه کاغاذلاری قان بوغسادا ، جیزیق لاریم بیتمه یه جک

 

بو گئجه یوخو اوچونجولویونو ایتیریب

 

گؤزلریمه اودوزاجاق....

 

" آتیلا "


یازار آتیلا گونئیلی بو 93/03/25 یازیلمیش قونو | بو یازیا لینک


اؤپدوم ..گولن آیین ییرمی بیریندن ..گولن آیین ییرمی بیرینه آددیملارین یئتینجی واراقلادی..بو گون سنه موتلو ناز چیچه ییم


یازار آتیلا گونئیلی بو 93/02/21 یازیلمیش قونو | بو یازیا لینک


 

هر کس اوچاماز....!!!!!

 

اوچوش اوچون اوره ک قانادی اولمالی.....


یازار آتیلا گونئیلی بو 93/02/19 یازیلمیش قونو قیسسا شعیرلر | بو یازیا لینک


دلی سن دئییرلر


اؤزله مک می؟ دلی سن دئییرلر

خسته کؤنول نومره سیز بیر قاپینین چاخچاخاسیندا دینجه لیر
دلی سن دئییرلر
یامان یوکو توتورام آرخاسیندا سن اولمایان سؤزجوکلره
داشینی یامانلاییرام آیریلدیغیم هر یئره
اوشودوم ها اوشویورم
داغدان آلینیمیش داشا اوخشاییرام
اینتحاری واراقلاییب دنیز گؤزونده اوزوره م
اوزمک می؟ دلی سن دئییرلر
اوزور شعیر دوغوشونون سانجی سی, اوره ییمین بندینی
سویا قیلینج وورورام
اونوتورسام دنیزی دوز گؤلونه دؤنه جک...اؤله جک
اونوتمایی قوسورام
آغریلاریمی قونو سورورام
شعیر قونوسو اولورام
سیقارالی رسیم لرین سوسقونلوغونو چئینه ییب ,هارای توپوروره م
من بویام....
آغا قارا ساچیرام 
قارا آغ یازیرام
سیلینه جک می؟ گون دوغون جا
دلی سن دئییرلر
آلماجیغیمی آلینجا جورو بارماغیم تانری گؤزونده سینیر
حاق قاپیسی باغلانیر
کیلید بابام بوینوندا
بابام اوین ده وطن شارقیسیلا اوروج توتور
یاساق دیلیمی آغزیمدا قان بوغور
سنی یاساق لار ایچینده یازیرام, اونوتاجاقسان دئییرلر
داریخما سانجی سی بوغونجا تبریزی
هارای هارای بیچیلیره م
وطنی سئوگی سؤزجوکلرینده تیکه توتورام
سئوگی کوچه سینده دووارلارا یازیلیرام
قارالایاجاقلار دئییرلر
قارقالارین تویو یاسا دؤنور
اود تانرینین جییرلری یئنیدن تیکیلیر
بیلیرسن می؟
قاراگیله هاوالانینجا تبریز میناره لریندن
قیریخ تؤکوک سؤزجوکلرین ائلچی سی اولورام
تانری دوغورام
دلی سن دئییرلر,بیراخ هر نه دئییرلر

"آتیلا"


یازار آتیلا گونئیلی بو 93/02/19 یازیلمیش قونو سئوگی شعیرلری | بو یازیا لینک


Mutlu Ol Qadınım....



Bu şehirde Bir Qadın Var Çox Gözel....

Yanağındakı Ğemzesi Şux....

Gözlerindeki Sevgi Güneş....

Dodağındakı Guluş Bal Calayır Aci reallara....

Ellerindeki Güneş Varaqlanır....

Üreyindeki Cennet Devrimdir Narkotikler Üzerine....

Bu Şehirde bir Qadın Var Çox Gözel

Hammısı Mene Özel....

Sen Dünyamsan ve Sen Bir Qadınsan ....

Mutlu Ol Qadınım....Perim....

Atila



یازار آتیلا گونئیلی بو 93/01/31 یازیلمیش قونو قیسسا شعیرلر | بو یازیا لینک





یازین 7سینده یئتینجی هارایلادی بارماغیمیزداکی اوزوک....


یازار آتیلا گونئیلی بو 93/01/14 یازیلمیش قونو سئوگی شعیرلری | بو یازیا لینک


نه قارانلیغی جیزیق چکدیم نئده ایشیغی تاپیندیم....
من سنینله ایشیق دوغولدوم قارانلیق باغریندا..ذره جیکلریمیز باغیردی تورکوموزو..


یازار آتیلا گونئیلی بو 92/12/12 یازیلمیش قونو قیسسا شعیرلر | بو یازیا لینک


0:00



بوتون آنلارین یاخاسینی سوکور


ان گؤزل حاللارین اؤته سینی وورور


سیفر,سیفری قوجاقلایبب


0:00


سندن  ، "سنی سئویرم چیچه ییم" ائشیدینجه....




یازار آتیلا گونئیلی بو 92/12/06 یازیلمیش قونو قیسسا شعیرلر | بو یازیا لینک


قارا گیله گؤزلرینین فاتیحی یم....

هر گون منی دوغور گؤیوم

دامجی دامجی اؤزلم , وطن , سن , یاغیرام ایچیمه

یاشام هؤوشنه سینه اوره ک اوره ک بیچیلیرم

سئل اولوب آخیرام

گؤزلرینی پروپرانول جالاییرام اوره ک دؤیونتولریمه

شعیر ناملوسونا دولور زهر

هارایلانیب تبریزی سانجیرام

آرخاما دؤنوب فلسفه یورقانینا  بورونموش جیزگی لریمین یوخلاماسینا باخیب

تبریزی سانجیلانیرام

چؤپلویون دیبینه تاخیرام  سیقار قوخولو جیزگی لری

تبریز کوچه لرینی آخیرام

قارا گیله گؤزلریمده گؤزل گؤرونور

آلا داغلاردان بویون باغی آسیب سینه سینه

تبریزی بورونوب اَینینه

گؤزلر, گؤزل لیک لری یوروملایینجا

یانیب یانیب, وطنی کؤز اولورام

قاوالچی کیشی نین نوتاسیندان چالینیرام

پارادوکسا اؤز دوشونجه

دوشونجه دن قـُوولوب,توستو بورونموش جیزگی لردن بوغولورام

ایچدیییم بوتون جیزگی لری قوسوب, باشیما چکیرم گؤزلرینی

جانلا آلیرام,جانلانیرام

جالانیرام سؤزجوک سؤزجوک

کؤزه ریر دوداغیمدا بومبا بیر اؤپوجوک

منه نه وار گونده مین دون گئیه ن تانریلار

منه نه وار ساحیله تاپشیریلمیش اؤلو دالغالار

چیلغین لپه دلی سی یم

اینتیحارین ائلچی سی یم

من تبریزین فاتیحی یم

یوخسا,منه نه وار تانری آغاجیندان چالینمیش آلما

یئتر کی گئجه گؤزلرینی مندن آلما

دیسکین سه ده آی اولدوزدان تبریز گؤیو

سؤزجوک لری آی اولدوزلو سپه جه یم گؤزلرینه

تانری آلسین ,تاجیر ساتسین

آلان  آلسین,ساتان ساتسین

قارا گیله گؤزلرینین فاتیحی یم

 

"آتیلا"


یازار آتیلا گونئیلی بو 92/12/01 یازیلمیش قونو سئوگی شعیرلری | بو یازیا لینک


یانیمدا قال....

بیلمم نئچه ایل سورموش سنی دوشوندویومون سوره سی

گؤز اونومده دانس ائدرکن

اَل قالدیران بیر رسیم

یانیمدا قال دئییردی هر یئریم

یانیمدا قال دئییردی بویالار

بویالار سندن بویالانیر

گؤزلرین سه گئجه لردن باج آلیر

ساوالان دیر دیله ییم

یانیمدا قال

 یوخسا

اوره ک ساعات میدانینین ساعاتی کیمی دایانیر

سؤزجوک یانیق اَرکیمده قورشونلانیر

شاپالاق شاپالاق وورولور آرزیلاریم یابانلاردا

گولوستان باغیندا گول یاخاسیندا آسیلیر جیزگی لریم

بوغولور ائل گؤلوده سسیم

یانیمدا قال

یوخسا تبریزی قان آلیر....

 

"آتیلا"


یازار آتیلا گونئیلی بو 92/11/26 یازیلمیش قونو قیسسا شعیرلر | بو یازیا لینک


او گئجه بیزیم گئجه ....


 

او گئجه بیزیم گئجه ....

......

بیر گئجه نین باغریندا کی سوکوت

 آی اوزونه چکیلمیش بولوت

سس سیز بیر ملودی ، شه هرده کی سوکوت

 یان یانا دوشور اؤلو سوروسو

یاس توتولموش تبریز ، ترسه اوینانیر

سارسیلیر سئوگی تمللری

پیچی بوشالیر اوره ک لرین

بئله سوروشور

بئلدن آشاغیا دوشور

بیر اوره ک مین یونه چارپیر

یالاواج دوشموش تانری ، شه هرین قارانلیغیلا سئویشیر

باغرینا باسیر سوکوتو

ایچیندن بوشالیر زهر

شهنازی بوغور قه هَر

ارکک لرین بئلی تربیتده بوشالیر

ساعات میدانی ، سوسقون لوقلارلا اؤپوشور

یاشاییشی اؤلور

بیر گئجه ده وار

خاتا دولوسو

بو قارانلیق شه هرین گیله سیندن دوغولور

قوسور بوتون سوکوتو

سانجی باسمیش هارایی وار دیلینده

توپورور هارای ، شه هرین کیرلنمیش صیفتینه

او گئجه منیم گئجه م

ایشیق دوغدو قارا گؤزلوم

او گئجه بیزیم گئجه

اوره ک سوکولدو یئریندن

سؤزجوک لر بوکلوم بوکلوم آخدی قلمیمدن

دوداق قاچدی گولوشوندن

 قیغیلجیم ساردی دنیز گؤزلر ، گؤزلریمی

سؤندورمه یه گلمه ییب دیر قانادلی قیز

قوجاق قوجاق سویومایا

گوندن گونه دوغولمایا

قادینلیغین ، ارکک لییین وارلیغینی توخومایا

سؤندورمه یه گلمه ییب دیر قانادلی قیز

گؤزلریندن قان چیله ییر گؤزلریمه

اَللریندن جلاد دوشور سؤزجوکلریم

اوره ییندن قاتیل دوغور جیزگی لریم

دار آغاجی کسیلیب دیر دوشونجه سی

خسته لیک لر تپه سینه ....

منه باخین دلی دولو بیر شاعیرم

هن بلکه ده ساچما ساپان سؤیله ییرم

آلدانما سن گئجه لری شه هر

قارانلیقلار ائلچی سی دیر دار باخیشلار

ایشیم ایشیم ایشیلداییر قارا گؤزلوم

اوره ییمین گؤزگوسونده

ایسلاق ایسلاق دوداقلاری

قان اَمزیریر سؤزجویومه

دیسکین شه هر ، دلی سویام

سئوگیلیمین گؤزلریندن بیر ایچیملیک ایچر اولسام

گئجه کوسموش گؤزلرینده اوزه ر اولسام

نفسینین جنت سارمیش قوخوسوندا اؤلر اولسام

دولار جیزگی ناملولاریم

دئوریم دوغار سؤزجوکلریم

قارانلیقلار شه هرینین تپه سینه

قان سالارام دولانباج لیق کوچه سینه

قاتیل اولار جیزگی لریم

سئوگیلیمین بیر باخیشین

سؤزجوکلره ساتمازام من

هله نئدیر سؤزجوک شه هر

دنیز دنیز گؤزلرینی

تانریلا پایلاشمارام من

باس ماشایا قارقا بئیین دوشونجه لر

بوردا اوچماز چیرکین لیک لر

 

"آتیلا گونئیلی"


یازار آتیلا گونئیلی بو 92/11/24 یازیلمیش قونو سئوگی شعیرلری | بو یازیا لینک