X
تبلیغات
سئوگی کوچه سی

Mutlu Ol Qadınım....



Bu şehirde Bir Qadın Var Çox Gözel....

Yanağındakı Ğemzesi Şux....

Gözlerindeki Sevgi Güneş....

Dodağındakı Guluş Bal Calayır Aci reallara....

Ellerindeki Güneş Varaqlanır....

Üreyindeki Cennet Devrimdir Narkotikler Üzerine....

Bu Şehirde bir Qadın Var Çox Gözel

Hammısı Mene Özel....

Sen Dünyamsan ve Sen Bir Qadınsan ....

Mutlu Ol Qadınım....Perim....

Atila



یازار آتیلا گونئیلی بو 93/01/31 یازیلمیش قونو قیسسا شعیرلر | بو یازیا لینک





یازین 7سینده یئتینجی هارایلادی بارماغیمیزداکی اوزوک....


یازار آتیلا گونئیلی بو 93/01/14 یازیلمیش قونو سئوگی شعیرلری | بو یازیا لینک


نه قارانلیغی جیزیق چکدیم نئده ایشیغی تاپیندیم....
من سنینله ایشیق دوغولدوم قارانلیق باغریندا..ذره جیکلریمیز باغیردی تورکوموزو..


یازار آتیلا گونئیلی بو 92/12/12 یازیلمیش قونو قیسسا شعیرلر | بو یازیا لینک


0:00



بوتون آنلارین یاخاسینی سوکور


ان گؤزل حاللارین اؤته سینی وورور


سیفر,سیفری قوجاقلایبب


0:00


سندن  ، "سنی سئویرم چیچه ییم" ائشیدینجه....




یازار آتیلا گونئیلی بو 92/12/06 یازیلمیش قونو قیسسا شعیرلر | بو یازیا لینک


قارا گیله گؤزلرینین فاتیحی یم....

هر گون منی دوغور گؤیوم

دامجی دامجی اؤزلم , وطن , سن , یاغیرام ایچیمه

یاشام هؤوشنه سینه اوره ک اوره ک بیچیلیرم

سئل اولوب آخیرام

گؤزلرینی پروپرانول جالاییرام اوره ک دؤیونتولریمه

شعیر ناملوسونا دولور زهر

هارایلانیب تبریزی سانجیرام

آرخاما دؤنوب فلسفه یورقانینا  بورونموش جیزگی لریمین یوخلاماسینا باخیب

تبریزی سانجیلانیرام

چؤپلویون دیبینه تاخیرام  سیقار قوخولو جیزگی لری

تبریز کوچه لرینی آخیرام

قارا گیله گؤزلریمده گؤزل گؤرونور

آلا داغلاردان بویون باغی آسیب سینه سینه

تبریزی بورونوب اَینینه

گؤزلر, گؤزل لیک لری یوروملایینجا

یانیب یانیب, وطنی کؤز اولورام

قاوالچی کیشی نین نوتاسیندان چالینیرام

پارادوکسا اؤز دوشونجه

دوشونجه دن قـُوولوب,توستو بورونموش جیزگی لردن بوغولورام

ایچدیییم بوتون جیزگی لری قوسوب, باشیما چکیرم گؤزلرینی

جانلا آلیرام,جانلانیرام

جالانیرام سؤزجوک سؤزجوک

کؤزه ریر دوداغیمدا بومبا بیر اؤپوجوک

منه نه وار گونده مین دون گئیه ن تانریلار

منه نه وار ساحیله تاپشیریلمیش اؤلو دالغالار

چیلغین لپه دلی سی یم

اینتیحارین ائلچی سی یم

من تبریزین فاتیحی یم

یوخسا,منه نه وار تانری آغاجیندان چالینمیش آلما

یئتر کی گئجه گؤزلرینی مندن آلما

دیسکین سه ده آی اولدوزدان تبریز گؤیو

سؤزجوک لری آی اولدوزلو سپه جه یم گؤزلرینه

تانری آلسین ,تاجیر ساتسین

آلان  آلسین,ساتان ساتسین

قارا گیله گؤزلرینین فاتیحی یم

 

"آتیلا"


یازار آتیلا گونئیلی بو 92/12/01 یازیلمیش قونو سئوگی شعیرلری | بو یازیا لینک


یانیمدا قال....

بیلمم نئچه ایل سورموش سنی دوشوندویومون سوره سی

گؤز اونومده دانس ائدرکن

اَل قالدیران بیر رسیم

یانیمدا قال دئییردی هر یئریم

یانیمدا قال دئییردی بویالار

بویالار سندن بویالانیر

گؤزلرین سه گئجه لردن باج آلیر

ساوالان دیر دیله ییم

یانیمدا قال

 یوخسا

اوره ک ساعات میدانینین ساعاتی کیمی دایانیر

سؤزجوک یانیق اَرکیمده قورشونلانیر

شاپالاق شاپالاق وورولور آرزیلاریم یابانلاردا

گولوستان باغیندا گول یاخاسیندا آسیلیر جیزگی لریم

بوغولور ائل گؤلوده سسیم

یانیمدا قال

یوخسا تبریزی قان آلیر....

 

"آتیلا"


یازار آتیلا گونئیلی بو 92/11/26 یازیلمیش قونو قیسسا شعیرلر | بو یازیا لینک


او گئجه بیزیم گئجه ....


 

او گئجه بیزیم گئجه ....

......

بیر گئجه نین باغریندا کی سوکوت

 آی اوزونه چکیلمیش بولوت

سس سیز بیر ملودی ، شه هرده کی سوکوت

 یان یانا دوشور اؤلو سوروسو

یاس توتولموش تبریز ، ترسه اوینانیر

سارسیلیر سئوگی تمللری

پیچی بوشالیر اوره ک لرین

بئله سوروشور

بئلدن آشاغیا دوشور

بیر اوره ک مین یونه چارپیر

یالاواج دوشموش تانری ، شه هرین قارانلیغیلا سئویشیر

باغرینا باسیر سوکوتو

ایچیندن بوشالیر زهر

شهنازی بوغور قه هَر

ارکک لرین بئلی تربیتده بوشالیر

ساعات میدانی ، سوسقون لوقلارلا اؤپوشور

یاشاییشی اؤلور

بیر گئجه ده وار

خاتا دولوسو

بو قارانلیق شه هرین گیله سیندن دوغولور

قوسور بوتون سوکوتو

سانجی باسمیش هارایی وار دیلینده

توپورور هارای ، شه هرین کیرلنمیش صیفتینه

او گئجه منیم گئجه م

ایشیق دوغدو قارا گؤزلوم

او گئجه بیزیم گئجه

اوره ک سوکولدو یئریندن

سؤزجوک لر بوکلوم بوکلوم آخدی قلمیمدن

دوداق قاچدی گولوشوندن

 قیغیلجیم ساردی دنیز گؤزلر ، گؤزلریمی

سؤندورمه یه گلمه ییب دیر قانادلی قیز

قوجاق قوجاق سویومایا

گوندن گونه دوغولمایا

قادینلیغین ، ارکک لییین وارلیغینی توخومایا

سؤندورمه یه گلمه ییب دیر قانادلی قیز

گؤزلریندن قان چیله ییر گؤزلریمه

اَللریندن جلاد دوشور سؤزجوکلریم

اوره ییندن قاتیل دوغور جیزگی لریم

دار آغاجی کسیلیب دیر دوشونجه سی

خسته لیک لر تپه سینه ....

منه باخین دلی دولو بیر شاعیرم

هن بلکه ده ساچما ساپان سؤیله ییرم

آلدانما سن گئجه لری شه هر

قارانلیقلار ائلچی سی دیر دار باخیشلار

ایشیم ایشیم ایشیلداییر قارا گؤزلوم

اوره ییمین گؤزگوسونده

ایسلاق ایسلاق دوداقلاری

قان اَمزیریر سؤزجویومه

دیسکین شه هر ، دلی سویام

سئوگیلیمین گؤزلریندن بیر ایچیملیک ایچر اولسام

گئجه کوسموش گؤزلرینده اوزه ر اولسام

نفسینین جنت سارمیش قوخوسوندا اؤلر اولسام

دولار جیزگی ناملولاریم

دئوریم دوغار سؤزجوکلریم

قارانلیقلار شه هرینین تپه سینه

قان سالارام دولانباج لیق کوچه سینه

قاتیل اولار جیزگی لریم

سئوگیلیمین بیر باخیشین

سؤزجوکلره ساتمازام من

هله نئدیر سؤزجوک شه هر

دنیز دنیز گؤزلرینی

تانریلا پایلاشمارام من

باس ماشایا قارقا بئیین دوشونجه لر

بوردا اوچماز چیرکین لیک لر

 

"آتیلا گونئیلی"


یازار آتیلا گونئیلی بو 92/11/24 یازیلمیش قونو سئوگی شعیرلری | بو یازیا لینک


"یالقیز کوچه"


ان سئودیییم شعیر: "یالقیز کوچه"

هر شئی اولا بیلیر....اودا اولا بیلیر...

آرتیق دویولماز گئچمیشین سولموش گؤزلری

تاپیناجاغیم قالمادی ,کافیر دوشدوم تانرییا

پئشمان تانری قوسدو منی ....

 بیر دلی سوی یالقیز کوچه  ، سینه سینه

اینتحار دوشونجه م سمپاتلیغا سیغمادی

قیردیم زنجیر چیچه یین ، پوفله دی منی کوچه نین دوداقلاری

آسیلی دئییلم عاصییم

بیر دلی اووچونون آج دویغولارینا یئم اولماغیم گلیر

اووچو گؤزلرینی سیخیب سؤزجوکلره

منسه ، سینه سینه کاغاذ  گزیرم

حسرت قالسادا گؤزلرینین رنگینه گؤزلریم

هر گئجه شاراب دادیزیر دوشلریندن دوداقلاریما

سسینه قوربان کئسیرم قولاقلاریمی

من کئفلی کئفلی ، سسینین ماهنی سی بئینیمده ، سیر ائدیرم خاطیره لری

یوخ ، خاطیره لر اسمرلی دونلرین خاطره سی دئییل

بو گون کی دلی آرزولاریم دیر

یاریم قالسا بئله اینتحارا جان آتیرام

گونده مین یول قانچیل باسیر خاطیره لر دوداقلاری

اؤپورم, دونیانین بمبا اؤپوشونه بویلو قالیرام

اینتحارا جان آتیرام

یالقیز کوچه ده هر شئی اولا بیلیر

اودا اولا بیلیر....

 

" آتیلا گونئیلی"

.....


یالقیز  کوچه ده هر شئی اولا بیلیر بیر سنسیزلیک ....



یازار آتیلا گونئیلی بو 92/11/24 یازیلمیش قونو سئوگی شعیرلری | بو یازیا لینک


 

 

قولاغیمدا چالینیر تورکو نفسین
وطن مارشی دیر سانکی
سایغی دوروشام
اوچوشام....

 


یازار آتیلا گونئیلی بو 92/11/23 یازیلمیش قونو قیسسا شعیرلر | بو یازیا لینک






بیر دلی شاعیر اوخودوم ، دلی سی اولدوم....



یازار آتیلا گونئیلی بو 92/11/23 یازیلمیش قونو قیسسا شعیرلر | بو یازیا لینک


یوخلوغون..


یوخلوغون ، یالقوزاق بیر کوچه
هارایا باغلی دوشموش قاپیلارینین آغزی
یاز چاغیما قار یاغیری قارقالارین مئساژی
یوخلوغون ، چالقی والقی یا دوشموش ، سؤزجوکلریمین دیدرگین لییی
ایچیمده کی اوشاغین اونوتولدوغو
شیطان قحبه سینین جین باخیشلارینا امزیریلدییی
کائنات تابلوسونون بوشلوغو
ایللر بویو سس سیزلییه یاتماغیم دیر یوخلوغون
وورغونو گوجلو گلمیش آیرلیغین ، دپرمینه دام دووار اولوب اوچدوغوم
یوخلوغون ، آیریلیغین صاباحی
سن ایمکانسیز شارکیسیندا ، دؤنگه لری دؤندویوم
اؤلدویوم....
قارانلیغین اوره یینده ایشیق دوغور گؤزلریمه
ماهنی اَلین
ماهنی ماهنی اَل قالدیریشین
چیچک آچیر ماهنی اَلین ، اومودسوزلوق باغلاریمدا
گیزلی گیزلی دؤیونونجه اوره ییمده سئوگی آدین
سویونورام یوخلوغونو
بورونورم وارلیغینی


یازار آتیلا گونئیلی بو 92/11/19 یازیلمیش قونو سئوگی شعیرلری | بو یازیا لینک


سویوق شعیر....



احمد قارداشیم دان بیر شعیر:

 

سویوق شعیر

بیلمیره م هاردان باشلاییم
گونلریمین گونده لیکلرینین
ایری یازیلی تیتراژلاری ... سن
سنجه هاردان باشلاییم؟
آدیملاریمی آنی لار بویونجا گوتوروره م
قورشون کیمی سوزولوره م
بیتمه یه دوغرو
ایندی کی آخیرام
ایندی کی یازیرام گونلر ساپینا دوزولوره م
آجی رئاللارا بیچیلیره م ده
بیلمیره م هاردان باشلاییم
آددیملاریم تورپاغا ایز بوراخیر بو باشلانماغی
دئمک لا پ دوغروسو
باشلانما ماغی
هه......سنده باشلان! سنده باغلان! آمما منیمله یوخ
هانسی آندا، منیمله سن باشلانمامیشسان.
آرتیق...
قارانلیق بوراخ خیاوانلاردا سورو تک دوزوله ن چیراغلارا
اوره ییم قان ایچینده بیرآدا
بوراخیلسین سئوگی آدلی بیر قادا
یعنی سون قوی "باشلانماماقلارا"
خاطیره لر ساققیز چئینه لیینیر بئینیمده
وولقانلانیرام آنی لار لزگی سینده ن
اوزاخلاش منده ن
گمی لرین باتار دنیزلی
گؤزله ریمده
آه........سئوگیلیم
 
سئوگینه یاماخ تیکیلدییم گونده ن
اؤزگه لیکلرین قونشو دوشدو هنده وریمه
یامان اوشوتدو منی
دوندوردو بئینیمی, دونیامی یعنی
دونیالاریمی
 
یورولورام داها
یورولورام یاغمورلاری ایسلانماقدان
چیچک لری اولدوز اولدوز
تئللرینین قارانلیغینا
دوزمه کده ن
یا کی دنیز قیراغیندا
اوره کلریمیزی دییشمه کدن
اونا گؤره
گؤزله رین رومانتیک رومانتیک
گؤزله ریمده یورقان دوشک سالیب یاتاندا
توپورولدوم رویالاردان سویوق هاوایا
هئچ نه یه قیزیشانمادیم
بیلیره م
رویالارین سوبالاری داها آلیشمیر
ناغیللار اینانیلمیر
بودورویوره م
ییخیلماقدایام
قیشلاریم اوزومون دیئیل
کئچمیشین قالدیریملاری آددیملاریمی یییه له نیب
او قالدیریمدا قاوالچی کیشینین ماهنی سی
داملارین قارین
کوره ییر باشلایان آدیملاریما
قاوالینین نوتاسی
وطنی بایراق وئریر اوشویه ن اللریمه
شارقی سینین سوزو
اودامی یورقان چکیر تیتره ین اینیمه
ایزله مه منی, بولونمارام
اؤزگه لیک لرین قودوز دیرناقلاری
منی تیکه تیکه دیدیر
من اوجوز  اوره کلرین
 
سئوگی لرین و
و یونگول سئویشمه لرین
قویون قوربانلیغیام
منی پای وئره بیله رسن, آغ کاغیذلارا
کلمه کلمه, شعیر شعیر
بیله ن لر وار, سنده بونو بیل
وطنین چیرپینان اوره ک لرینین بیری من
گوتور
گوتور کورپه اوره ییمین قانین ماتیک وور دوداقلاراینا
گونله ریمین قاراسین ریمئل چک کیپریکله ره ینه
حسرتیمین قارین آغاتما یاخ یاناقلاراینا
بلکه
 
گؤزللنه سن بیر آن اؤزگه لر باخیشندا
 
ایزله مه منی بولونمارام
ذره ذره اورکلره سپیلمیشم
 
اولدوزلار کیمی بولوتلو گؤیلره
آداملار کیمی یاشاما ، اؤلومه
بیریسی بوشلوغا
بیریسی لذت آراباسیلا خییاوان تیرافیکینه
 
نوتا لار کیمی جیزگی لر اورتالیغینا
 
چالا بیلرسن منی
دویا بیلر سن منی
 
وطن! گؤزله منی
گؤنشی قارا گؤزلرینین آلتیندا باتیراجاغام
 
گوزه للیگیمی گؤزلرینین گئجه سینه آی آساجاغام
 
سنی یاراداجاغام
 
بیر وطن سیز دوشونجه یم ،
سن دوشونجه سیز وطن!
منی باس باغرینا ، قوی تانریلار
بئشیگینین گؤیلویونده
 
سون غضبلی شیمشکلرینی جیغ جیغا آسسینلار سنی کیریتمه یه
تلسمه
 
چوخو وار سنی سئومه یه
تلسمه منی دیدمه یه
 
بلیرسن ، بیلیرم
سوزؤلن باخیشلارا داها آلینمارام
یورویه نمیرم ، ییخیلماقدایام
بیلمیرم هاردایام
 
ایزله مه منی بولونمارام .
 

احمد حسینی

 


یازار آتیلا گونئیلی بو 92/11/18 یازیلمیش قونو سئوگی شعیرلری | بو یازیا لینک


گاهدان شاعیر اولمالی....

گاهدان چاره سیزدیر باخیش....
اؤلومه چاره سیز اولدوغو کیمی اینسان
سیچانین دویغوسو
پیشیک اونو یئمه ییب اویناتدیغی زامان
دای قوپاتمیرام یارانی
یارا اته یاپیشان یئره یئتیشیب
هئش قورخمورام قالار قالار چورویر
اونوتدوم گاهدان لاری دوشونه مه دیم
گاهدان یول اولمالی سان
بیری لری سندن کئچمه لی
نئره یه گئتدیکلری اؤنملی می ؟یوخسا
هن بلکه ده واز کئچمه لی
قوش باز ,قورخودان قوش بازلیکدان واز کئچمه سی کیمی
یولچولوقدان خوشلانمایان لار کیمی
یئنه آجیدی یارا
آجییرام ....آجیرام....
کامودا یابانجی اولورام
قوناقلیقدا ,دوروندااااا گئده ک داریخیرام اوتورانمیرام دئین قیز کیمی....
دورون گئده ک بنئری اولمالی
گاهدان آغاج اولمالی سان
بلکه ده یالنیز یولا باخمالی
یولا نردیوان اولمالی
گاهدان داغ اولورسان
داغی داغلار انلار
بلکه ده یالنیز هوندورلویونو قیسیلیب بیر جوت گؤزه دولمالی
بلکه ده بوغولدوقجا بیر جوت گؤزه بؤیومه لی
اوجالمالی....اؤج آلمالی....
دولاشیق دوشدو کوچه....
دوغرو گاهدان باشقا باخمالی
رسیمده گونشین پیریلتیسین گؤرمک اوچون
دوغرو گاهدان نوقطالاری دئییشمه لی
هر نه یی ائیلنمه لی ....
رسیم چوخ گؤزلمیش دئیر کیمی
سئور کیمی....سئویلمک کیمی ....
آند اولسون لاری یازمالی
گاهدان دا هر نئیی بیراخیب اؤزونه باخمالی
آخمالی, یابانجی کیمی ,سو کیمی ....
گونشین قیزمارلیغیندان
قان قایناییبدا ....اینتحاری واراقلامالی
بیر قورشون سیخیبدا بوشالمادان دوردونوده سیخمالی سان یاشامین قوردو طرفینه
بیراخ سؤزجوکلر دانسین
گاهدان گؤزل باخمالی سان رسیم کیمی
اوندان دیر اونوتمورام قارا گؤزلرین
قار گیله گلینلیکده تبریزین کوچه لرین دولانمالی
گاهدان اونوتمالی نئچه ایللیک اینتظار شارابین
مسافه لری یئرتیب کؤرپو قورمالی
گاهدان شاعیر اولمالی....
آتیلا....
·


یازار آتیلا گونئیلی بو 92/10/22 یازیلمیش قونو | بو یازیا لینک


باخچا,چیچه یین اینام دوروشو....


بیری واریمیش, بیری یوخوموش
قاش قاباقلی بیر گؤیون آلتیندا
یالقوزاق بیر باخچا واریدی
دیری دیری گؤمولموشدو قار آلتیندا
نفس لری جوجره بیلمیردی آرزیلاری, سینه سینده
بوغولموشدو شاختا سازاق اللریله ماهنی دیلی
قالابالیق بیر شه هرین اورتاسیندا
یالقوزاق یارانمیش بیر کوچه نین رسمیی دی
آی سیز بیر گئجه نین سوکوت قارانلیغیندا
بیر چیچک جوجرمیشدی ,یاشام بویدا قارین آلتیندا
سحر قالخیب دا سینه سینی جنت گؤرموشدو باخچا
تبریز بویدا وقارلی بیر دوروش
گؤی مچیدین رنگی دولخسونوردو چیچک لیینده
یاغیش اولوب تبریزی یاغمایان لارا قیزقین
ارکی پیچیلداییردی قار آلتیندان باش قالدیران تبریز دوروشو
دیم دیک باخیردی گونشین قیزمار گؤزلرینه
فرحله نیردی باخچانین یاز دویغوسو
توپراق سینه سی
قوجاق اولوب ماهنی لاشیردی
هردن کوله یه تیتره ییردی چیچک
شاختایا سویویوردو توپراق
یئنه یئنه لر له یئنیک دوشوردو شاختا
باخچایلا چیچه یین دئوریم باخیشلارینا
دولوردو باخچا چیچه یین دامارلارینا
دینجه لیردی دوروشونا
نفس چکیردی چیچه یین وطن عطرینی
گول بولبول ماهنی لاری سوسموشدو
باخچا چیچک ارکستراسیندا
چیچک باخچایلا جان جانا سئویشیردی
یاز دولموشدو سئوگی بوتونلوکلرینه
شه مینجیغی تر آخیردی چیچک یاناغیندان, باخچا اوزونه
سیم سیخی بیر یازی ساریلیردی باخچا چیچک سئویشمه سی
اوچوش سکگیزینجی نوتو دوغوردو
کؤک کؤکله اؤپوشوردو
بیر پازل دیر بوتونله شیردی
دوغرو, هردن داشیردی باخچا, گونشین شاللاغی آلتدا
سولوب بوینون بوکوردو چیچک
یئنه یئنه لره اودوزوردو گونش
بو دئوریمی گؤروبده ,گونش
ناغیل یازدی
بولوتلارین سینه سینه
باخچانین توپراق دیلیندن
بیری واریدی
داها هئچ کیمسه یوخودو


یازار آتیلا گونئیلی بو 92/10/22 یازیلمیش قونو سئوگی شعیرلری | بو یازیا لینک


سنی سئورکن سن سیز سن سیز یاشاماق


نفس آلدینسا, وئره جکسن

سئودین سه دلی لر کیمی داریخاجاقسان

هاوالاناجاقسان سؤزجوک قابیغیندا جیزگی لر دنیزینده

مسافه لره قاپیلیبدا یارالاناجاقسان

اَل اَله آددیملادیغین قالدیریم لاری خاطیرلایاجاقسان

ایچینده کی قه هر لری اودقونوبدا,گوله جکسن

گولدوره جکسن....

سئویشه بیله جک لرینی دانیشیب دا

تومانچاق بیر دویغویلا سئویشه جکسن

سئودین سه بیراخاجاقسان

یامانلی یاجاقسان آیریلدیغین کوچه نین داشینی

اوشوسنده پالتونو چیخاراجاقسان

چیخاردیغینی ایستینه جکسن

او,ناز بیر دویغویلا کوسدویونده سندن

سنده ایجه شه رک دورد آددیم آتیب دا

دؤردونجونو اؤله جکسن

دؤنه جکسن...

آمما بوتون سیرلار یئرینده

سنی سئورکن سن سیز سن سیز یاشاماق

اَللرینی داریخماق

گؤزلرینین اؤزله مینه اؤلمک

اود آلووا یئم اولماقدیر....

"آتیلا"


یازار آتیلا گونئیلی بو 92/10/06 یازیلمیش قونو سئوگی شعیرلری | بو یازیا لینک


هؤرومجک ساریر سنی سئوگی


بعضن باغلانمیرام دئیه باغیریرسان

سونرا باغیردیغینی اونوتوب

اؤزون بیلمه دن ساریلیرسان

اونوتورسان هئچ سؤیله نمه میش کیمی

هؤرومجک ساریر سنی سئوگی

دنیز دئیه بیر جوت گؤزه دالیرسان

دویمادان درین لرینه باتیرسان

بوغولورسان دنیزی

سونرا اوره یینین دوینتوسونده حیس ائدیرسن ایزی

هاوالانیر سؤز ماهنی گؤزلرینده

جالانیر بیر تورکو

اَللر قوُوشان نوقطا دیر جنتین اؤزو

قوسورسان کئچمیشین آجی اؤزگورلویونو

بیله کلرینی توتاراق

چیغیریر اَللرین سئوگی قاندالی نی

بیر ماهنی ائشیدیبده

بیر دونیا

آنلارسان

ایکی سؤزجوکه سرخوش اولوب

بیر عُمور کئفلی قالارسان

"آتیلا"


یازار آتیلا گونئیلی بو 92/10/06 یازیلمیش قونو سئوگی شعیرلری | بو یازیا لینک


سنلی گونلریمین چیلله گئجه سی


گلدی سنلی گونلریمین چیلله گئجه سی


ان اوزون گئجه


قیسسا گوندوز


اوزون یئتینج ,قیسسا آیریلیق


و سنه یازدیغیم چیلله قوتلاماسی


چیله گؤرمه سین قارا گیله گؤزلرین


بیر یاندا سئوگی قایناغی نار باخیش لار


او بیر یاندا تورکو تورکو گؤزلردن آخان آرزی لار


بیر یاندا سئوگی اویکوسو


بیر یاندا دوشونجه کورسوسو


بیر یاندا سن ، او بیر یاندا یئنه سن


چیلله گونونده چیله عمورلوک یوخ اولسون گؤزلریندن پریم


"آتیلا"




یازار آتیلا گونئیلی بو 92/09/30 یازیلمیش قونو قیسسا شعیرلر | بو یازیا لینک


بیر یانی سن او بیر یانی دا سن


دومان باسیب شه هری

چن بورونموش آغاجلار, دانس ائدیر یوخونو

زوو گئدیر دوشونجه آددیملاری

قار اریمه مه یه محکومدور سانکی

باشقا بیر سکانس دا

یاز اللری قووشموش, بیر شه هرین سویوق قالدیریملاریندا

الیمده الین

جیبیمده اللریمیز

یاشام نه دونو گئیرسه ده

قووشاجاییز بیز, دئییرلر اللریمیز

سس سیز آخشام اوستو بیر قارانلیق پارکا

قایناییر ایکی اوره ک دمیر نیمکتده

قوللارینی آچیر بیر فوتوگرافدا یاز

شاعیر آز چوخو بیراخ

بیراز درین یاز

سونرا رئکلاما کئچیر سئوگی

سویوق ساغلیغینیزا تهلوکه

سئوگی بورونون

دئییر

بیتیر رئکلام

امما هئچ بیتمه ییر آددیملار

هئچ بیتمه ییر او گؤزلرده بایراقلانان باخیش

یادیندا اؤپوجوکلرینله یاغیردی یاغیش

او گونده هپ اویله ییدی باخیشین

اوزاقلارا چکیلن بیر یاخین

سانکی کؤرپو وورموشدو گؤزلرین

آدیمی چاغیریردی سؤزلرین

آمما جنایت ائتدی, یئنه او گون اللرین

یئنه دانس ائدیردی یئنه لر

یئنه او کوچه ده سون آنلارا قدر بیراخیلمایان اللر

بیر مئساژدیر باغیریر الرین اللریمده

الیم الینده

بیته جک بیر گون گئتمه لر

یئنه آرتی یا مینمیش سئوگیم

آرتی سونسوزلوق

سنی یاشامدان باج آلیرام

یاشامی سندن

سنی دوغرولاردا یازیرام

دوغرولاری سنده

یئنه ده بیتمه ییر یئنه لر

یئنه سن

یئنه هئچ تانیمادیغیم سن سیزلیک

یئنه گؤزلریمده بایراقلانان ایکی هیجا

دوداغیمدا هارایلانان تورکو

خیاللاردان دوغان رئال

بیر یانی سئوگی او بیر یانی دوشونجه

بیر یانی سن او بیر یانی دا سن


"آتیلا"


یازار آتیلا گونئیلی بو 92/09/30 یازیلمیش قونو سئوگی شعیرلری | بو یازیا لینک


من سنی.. سئودیم


من سنی..
سئودیم
ایلک گؤروشون سنه دوغرو باشلانان
ایلک آددیمدا
تیترک سسیمین یانیق نوتاسیندا
من سنی اوره ییمین آغریسیندا
سنه گلن یوللارین اوزون اوزون هاوالاریندا
توتوقلو اولدوغوم آزادلیقدا
من سنی واز کئچدیکلرینده سئودیم


یازار آتیلا گونئیلی بو 92/09/25 یازیلمیش قونو قیسسا شعیرلر | بو یازیا لینک


سنی چالیر ثانیه لریم


بوراسی یاشام

بوردا هپ بیر یاسا دورغوندور

هئچ بیر یاسا دورغون دئییل

بوراسی یاشام

ساعات کپکیرلری چاپا چاپ آت یورودور

نه باشلانقیج نه سون تانی ییر

باشلی باشلانقیج لار

سونسوز سونوج لار زاماندا یاشاییر

هر شئی اونوتولور

بوراسی یاشام

سنی سئوه ن آن دان بری

ساعات هر آن اون ایکی نی وورور

سانکی زامان دورور

اؤلور کپکیرلر ثانیه لر قوجاغیندا

یاساق آلما اوره ییمده وورور

بوراسی یاشام

هر شئی اونوتولور

بیر تک سنده اولور زامان

جنت اوره یینده چیرپینیر

من سنی بؤیله سئودیم

سنی اونوتمامایا

سوسدو زامان

قربان کئسیلدی یاشام

بوراسی یاشام

سنی چالیر ثانیه لریم

....

"آتیلا"



یازار آتیلا گونئیلی بو 92/09/25 یازیلمیش قونو سئوگی شعیرلری | بو یازیا لینک